P5 mil ni Sanchez insulto: Duga-duga

Gihulagway sa station manager sa DyXR Aksiyon Radyo nga usa ka dugang-insulto ang gibuhat ni Bise Gobernador Gregorio Sanchez pagtanyag kaniya og P5 mil nga ipuno sa piyansa aron makagawas kini gikan sa iyang pagkatanggong sa Talisay City Police Station.

“Ayaw na lang pud. Sakto na nga natunol ang imohang interes ug intensiyon. Ayaw na lang pud og pang-insulto kay gamay pa gyud mi kaayo isip brodkaster ingon anaon pa gyud sa pagtratar. Mura’g sobra na pud kaayo,” si Carlo Duga-duga nagkanayon sa dihang nahinabi sa Banat News. Si Duga-duga nakagawas na kagahapon.

Apan si Sanchez nagkanayon nga dili niya intensiyon ang pagpapriso ni Duga-duga.

Matud sa bise gobernador nga intensiyon lamang niya ang pagpa-undang sa pagpanibya ni Gilbert Wagas, ang prinsipal sa kasong libelo nga iyang gipasaka.

Si Sanchez miingon nga mireklamo na siya niadtong 2006 sa Kapisanan ng mga Brodkaster sa Pilipinas Cebu chapter batok ni Wagas tungod kay wala kini KBP accreditation samtang nagpadayon gihapon sa pagpanibya.

Si Duga-duga wala makasang-at og counter-affidavit sa kiha ni Sanchez hinungdan nga milusot ang warrant of arrest batok kaniya.

Si Wagas gikiha ni Sanchez tungod sa mga pagsaway niini sa programa niini sa Aksiyon Radyo nga “Wagas ug Gawasnon” matag alas 12 ngadto sa alas 12:30 kada udto sa Aksiyon Radyo. Isip station manager, naapil si Duga-duga sa kaso. (Wen Celen)