Patay nang nakit-an ang usa ka lalaki nga naglunang sa iyang kaugalingong dugo human gidudahang giunay og pusil sulod sa duha ka higayon sa iya ra usab nga manghod didto sa Sityo Tulabogan barangay Talisay, lungsod sa Santander Cebu niadtong Biyernes sa alas 9 sa gabii.
Ang biktima giila sa kapolisan nga si Rosalito Billacaol, 49, molupyo sa nahisgutang lugar ug nagtrabaho isip laborer sa usa ka pantalan nga nahimutang sa maong lugar.
Subay sa inisyal nga imbistigasyon sa kapolisan gidudahan niini nga ang manghod ra usab sa biktima nga si Gregorio Billacaol 42, minyo, usa ka tanod sa barangay ug kauban ra usab sa trabaho sa biktima maoy responsable sa krimen.
Gibutyag ni PO1 Edgardo Pacana sa Santander Police Station dihang nahinabi sa Banat News gikan nga nakig-inom ang biktima sa iyang mga higala ug sa manghod niini sa sayo pa niadtong Biyernes ug pagka human namauli kini sa ilang tagsatagsa ka pinuy-anan.
Matud ni PO1 Pacana nakadawat sila og alarma sa usa ka shooting incident hinungdan nga ila dayon kining girespondehan ug pag-abot nila sa dapit naglunang na sa kaugalingong dugo ug dunay samad pinusilan ang biktima sa iyang tiyan ug tuo nga paa hinungdan nga gidali nila kini pagdala sa tambalanan.
Apan ang mga doktor sa Oslob District Hospital sa lungsod sa Oslob mideklarar nga dead on arrival (DOA) ang biktima.