“Karnaper” giposasan

Usa ka 18-anyos kinsa giingong carnapper ang nasikop sa kapolisan niadtong Biyernes sa hapon diha sa usa ka dakong tindahan sa Barangay Tabunok, dakbayan sa Talisay.

Ang suspetsado mao si Felix Abria Jr. alayas “Junboy” lumad nga taga Sindangan, Zamboanga del Norte ug nagpuyo sa Barangay Mohon sa maong dakbayan.

Si PO2 Prompi Tanajura Jr. sa Theft and Robbery Section sa CCPO ang nangayo og ayuda sa kapolisan sa dakbayan sa Talisay aron pagsikop kang Abria.

Si Police Inspector Jaime Santillan ug PO3 Mickie Espina mga polis sa Talisay ang mikuyog kang Tañajura nga miadto sa gipuy-an ni Abria sa Mohon apan wala kini didto ug kini ilang nasikop sulod sa usa ka dakong tindahan sa Tabunok.

Dala sa maong mga polis ang order of arrest nga giluwatan ni Regional Trial Court Judge Arturo Paculaba sa Branch 11, Sindangan, Zamboanga del Norte batok kang Abria.