13-anyos nga lalaki naghikog human kasab-i sa inahan

Nagkutlo sa iyang kaugalingong kinabuhi ang usa ka 13 anyos nga batang lalaki human gikasab-an sa iyang inahan sa Sitio Tuhob barangay Tyompo lungsod sa Carmen niadtong Huwebes sa alas 6:00 sa buntag.

Ang 13 anyos nga biktima taguon lang nato sa pangalan nga Boyet nagpuyo sa iyang inahan ug step father apan wala na magtungha.

Gibutyag sa hepe sa Carmen Police Station Insp. Carlos Reyes Jr., dihang nahinabi sa  Banat News subay sa ilang gihimong pag-imbestigar gikan sa inahan niini nga iyang gikasab-an ang bata niadtong Miyerkules sa buntag tungod kay wala kini motuman sa iyang gisugo.

Apan nilakaw pagkahuman ang bata ug nianang tibuok adlaw wala na mopauli hangtud na sa pagkagabii.

Kini maoy hinungdan nga gisusi sa inahan sa pagkabuntag nianang Huwebes ug sa paggawas niya sa pinuy-anan nakit-an nalang niini nga nagbitay na sa kahoy ang iyang anak nga dunay higot nga pisi ang liog nga gigaid sa kahoy.

Matud ni Insp. Reyes nga posibleng niana pang pagkagabii naghikog ang bata tungod kay migahi na ang lawas niini.

Nasuta sab sa gipahigayong autopsy nga walay foul play ang kamatayon sa biktima ug kagahapong adlawa gihatod na sa lubnganan ang patay’ng lawas niini.