Usa ka 57-anyos nga Belgian national ang mireklamong gipakitaan og armas sa anak ni Talisay City Mayor Socrates Fernandez nga si Joavan human sila magkomprontase diha sa dalan niadtong Martes sa gabii diha sa 9th Street Friendly Homes, Barangay Bulacao sa maong siyudad.
Ang nireklamo ngadto sa kapolisan giilang si Guedo Loyen, temporaryong nagpuyo sa maong lugar uban sa iyang pangasaw-onon nga si Anna Lorena.
Base sa imbestigasyon si Loyen sakay sa iyang sakyanan nga Toyota Tamaraw gikan sa usa ka department store sa dakbayan ug paingon na nga mopauli.
Apan pagsulod niini diha sa maong subdivision adunay nagbabag nga Isuzu Big Horn Trooper ug dihang iyang giduol ang drayber aron hangyoon pagpadaplin nasuta nga si Joavan ang nagmaneho niini.
Mialegar si Loyen nga imbes nga siya paagion gikatahong nasuko kaniya si Joavan ug misinghag kaniya kung wala kini makaila kaniya, human niini gikatahong gipakitaan siya niini og armas diha sa sulod sa sakyanan.
Kahinumduman nga niining bag-o lang si Joavan ang gipa-blotter usab sa gwardiya sa Tabunok Night High School tungod kay miadto kini sa maong tunghaan nga mikuha sa iyang ig-agaw atol sa klase ug nagbitbit og armas apan gibalik lang dayon ang tinun-an pila ka gutlo. (Brenda D. Batuto)