Sobra sa 100 ka mga punoan sa marijuana ang gipanglarot ug gisakmit atol sa gilusad nga joint operation sa kapolisan ug Regional Mobile Group (RMG-7) sa bukirang barangay sa Sityo Pangi Barangay Gaas lungsod sa Balamban, Cebu niadtong Lunes sa ala 1:00 sa hapon.
Gibutyag ni PO2 Hanibal Larida sa Balamban police station dihang nahinabi sa Banat News walay caretaker ug nanag-iya sa maong plantasiyon sa marijuana ang nasikop tungod kay nakaikyas na kini sa lugar paghiabot sa ilang mga kaubanan.
Matud ni PO2 Larida nga ang mga tinun-an sa Regional Training School sa maong lugar ang nakadawat sa impormasiyon niadto pang milabay'ng semana kabahin sa plantasiyon sa marijuana sa maong lugar ug nakig-alayon dayon sa ilang hepe nga si Superintendent Anthony Bagarinao.
Daling gilihok ang pagtakda alang sa joint operation tali sa RMG-7, SRU ug TRS niadtong Lunes ug miresulta kini sa pagsakmit sa 152 ka mga puno-an sa marijuana.
Ni-abag sab sa gilusad sa operasiyon ang mga tanod sa maong barangay.
Gibutyag ni PO2 Larida nga dili kalikayan nga dunay magkawat- kawat og pananom og mga marijuana sa bukirang bahin sa ilang lugar tungod kay dako kaayo ang maong bukid ug dunay mga hilit-hilit nga lugar nga lisud na kaayong sudlon ug menos na usab kaayo ang mga nagpuyo niini.
Ang mga nasakmit nga puno-an sa marijuana kasamtangan karong gikustodiya sa buhatan sa kapolisan sa Balamban samtang nagpaabot og opisyal nga kamandoan alang sa posibleng pagsunog niini. (Darrel A. Carumba)