Tulisan nasikop sa tanod sa Tejero; laing tulisan ipsot

Nasikop sa mga  tanod sa barangay Tejero ang usa ka tulisan human  nanulis sa duha ka lalaki  alas 10  kapin  kun  kulang kagahapon sa gabii diha sa  dalan Mac Arthur, ning dakbayan.

Ang nasikop giila nga si Pablito Osabel Lalario, 19,   nga taga  sitio Silangan 1, barangay Tejero ning dakbayan, samtang ang nakasikop niini mga  tanod sa Tejero   gipanguluhan ni Emmanuel Hernani.

Gibiktima sa suspetsado mao sila si Melquiades Colobia ug Morgan Maquilan nga gipangkuhaan og cellphone nagkantidad og P10 mil.

Gikatahong ang mga biktima samtang naglakaw sa nahisgutang dapit kalit lang gitionan ni Lalario  sa dala nga kutsilyo  ug  mideklarar og tulis.

Gi-turn-over  si Lalario ngadto sa Waterfront Police Station.

Samtang sa pikas  bahin,  laing suspetsado sa pagpanulis ang nakaipsot sa kapolisan human   nanulis sa usa ka 32 anyos nga babaye mga alas 11 pasado   sa miaging  gabii diha sa barangay Tisa.

Ang suspetsadong si Christopher Quimod  alyas Toper, taga Sitio Lutaw-Lutaw Barangay Tisa  nakaipsot sa kapulisan sa gipahigayong follow-up operation kagahapon sa kaadlawon.

Si Evelyn  Espolon, 32, nagpuyo sa Sitio Tambasan sa nahisgutang  barangay nakuhaan og cellular phone  nga mokantidad  og P10 mil, memory card reader nga tag P1,500  duha ka cellular phone memory card nga mokantidad sa P2,000 ug P500  nga kuwarta.

Base sa report sa Theft and Robbery Section, ang biktima misaysay nga gikan siya sa usa ka internet café sa nahisgutang lugar, apan samtang naglakaw   pauli, ang suspetsado mideklarar og tulis pinaagi sa pagtion sa wala matinong armas.

Ang kapolisan daling mipahigayon og follow-up operation human nailhan sa biktima si Toper kinsa iyang silingan apan ang kapolisan napakyas gumikan kay wala na kini diha sa ilang gipuy-an. (Guam P. Logroño)