Napanglantawan sa mga kadagkuan sa simbahan nga dili na makatapos pa sa iyang termino si Presidente Gloria Macapagal Arroyo sa 2010 tungod kay protestahan na siya sa katawhan.
Mao kini ang gipasabot ni Msgr. Achilles Dakay, liaison officer sa archdioceses sa Sugbo kinsa nagkanayon nga usa sa makapalig-on sa pag-alsa sa katawhan batok sa Presidente mao ang giingong pag-angkon niini nga siya nasayod sa tanang butang nga may labot sa gikagubtang kahiwian sa iyang administrasyon.
Gipasabot ni Dakay nga gibalikbalik pagsibya sa telebisyon niadtong Sabado ang interview sa Presidente nga matud pa miangkon kini nga nasayod siya sa tanan ilabi na ang bahin sa NBN-ZTE deal.
Gumikan niini, si Dakay miingon nga may kawsa nang kapasikaran ang katawhan kung sila mopabati ug mopalanog sa ilang tingog aron papahawaon ang presidente sa iyang puwesto.
Si Dakay mipalig-on sa pamahayag ni Cardinal Ricardo Vidal nga ang people power karon way kapuslanan ug ang epiktibo mao ang signature campaign alang sa ilang “search for truth” nga programa.
Miingon si Dakay nga ang buot ipasabot ni Cardinal Vidal, mao nga dili na mosaler karong panahona ang people power nga himoon sa gawas sa simbahan.