Arestado ang usa ka Koreano human kini gikatahong misuway og suborno sa mga polis sa Waterfront police station aron pabuhian gikan sa bilanggoan ang iyang higalang Koreano usab nga nadakpan tungod sa ilegal nga drugas.
Ang gisuwayan og suborno mao si SPO2 Darryl Alalim sa Miscellaneous Team sa maong police station ug mao usab ang midakop kang Park Chan Mo, 40, residente sa Ace Pension House sa Pusok dakbayan sa Lapulapu ug lumad nga taga Seoul Kang Mam Gu sa South Korea.
Si Park gikatahong mianha sa buhatan sa Waterfront police station kagahapon sa buntag dala ang P14,000 ug giingong mipugos kang Alalim sa pagpadawat sa kwarta bisan pa man sa pahibalo kaniyang gidili kini sa balaod sa nasud.
Tuyo untang pabuhian ni Park mao si Lee Jong Soo, 42, nagpuyo gihapon uban ni Park sa Lapulapu apan lumad nga taga Dong Dei Chow City sa South Korea.
Matud pang Alalim, naluoy si Park sa iyang higalang si Lee maong iya kining gitabangan. “I want to give money. Freedom of my friend,” maoy giingong gipamulong ni Park ngadtong Alalim.
Sumala pang Alalim iyang gipangutana kung nasayod ba si Park nga gibawal ang pagpanuborno dinhi sa nasud, iya usab kining gipasabot ug giesplikahan kabahin niini apan giingong nagpunay lang gihapon kini og yango-yango sa iyang ulo.
Human niini gikatahong gitunol ni Park ang kwarta kang Alalim hinungdan nga giaresto siya dayon sa mga polis.
Matud pang Alalim human sa pagkaaresto diha pa mikisi-kisi si Park ug nagpangutana kung nganong giaresto siya sa mga polis ug nangangkong para lang unta kadto sa piyansa kang Lee.
Apan mipasabot si Alalim nga kung piyansa kadto adto gyud kini ihatag sa korte inubanan sa iyang abogado.
Si Lee nasikop sa grupo ni Alalim uban nila ni PO3 Reynaldo Malazarte, PO2 Leonard Dinsay ug PO1 Jodan Batucan diha sa Morelos Street sa Villagonzalo II sa barangay Tejero alas 6 sa buntag kagahapon.
Ang kapolisan nipahigayon og preventive patrol sa maong dapit dihang ilang nasigpatan si Lee nga kadudahan ang lihok diha sa sudlonong bahin sa dapit nga unta langyaw man kini.
Dihang gisusi, nakuhaan kini og usa ka paketeng may sulod nga gidudahang shabu hinungdan sa iyang pagkasikop.
Gisuwayan og kuha sa mga tigbalita og habig ang duha apan nagdumili ang duha sa pagtubag ug namalik og panghigda sa karsel.
Samtang sayo pa niana, usa ka Norberto Salcedo Lim, 50, nga residente sa maong dapit ang nadakpan gihapon tungod sa paghupot og mga drug paraphernalia human sa ginukdanay sa mga polis.
Gikatahong nakabantay ang suspek pagkakita nila ni Alalim ug daling midagan apan gigukod kini sa mga polis ug nadakpan.