Ang dinaliang pagtubag sa alarma sa sunog nga mahitabo sa kabarangayan sa dakbayan sa Mandaue ang matigayon pinaagi sa tulo ka mga sub-fire station nga ipahimutang sa tulo usab ka barangay.
Kini ang gipadayag ni Mandaue City Fire Marshall Oscar Mayol nga nahinabi sa Banat News kagahapon kinsa nagpadayon na usab sa ilang pagpangandam alang sa kasaulogan sa fire prevention month nga buksan sa Marso 1 hangtod 31 karong tuiga.
Si Mayol miingon nga ang mga barangay nga iyang gitan-aw nga haom nga butangan og tulo ka fire substation mao ang barangay Basak, Subangdaku ug Banilad.
Ang mao niyang tinguha ang hingpit na niyang napadangat kang Mayor Jonas Cortes kinsa mipadayag usab og suporta.
Matud pa ni Mayol nga ang maong mga dapit nga haom alang sa pagpahiluna sa tulo ka fire substation maoy kasulbaran sa mga reklamo nga malangan sa pag-abot ang fire truck sa mga bombero sa pagtubag sa alarma sa sunog.
Gipasabot niya nga ang mga hinungdan nga malangan sa pag-abot ang mga fire truck sa pagtubag sa alarma sa sunog mao ang masinati nga trapiko sa mga dalan nga agian.
Dugang pa niya nga ang gilay-on sa barangay nga nahitaboan sa sunog ang kabahin na sa mausik nga panahon alang sa dinaliang pagpawong sa kalayo.
Gitataw nga makahatag kaayo kanila og dakong bintaha sa dinaliang pagtubag sa alarma sa sunog ang pagpahimutang og tulo ka substation ngadto sa nahisgutang mga barangay. (Romeo T. Limpangog)