6-buwan pagkasuspenso sa kawani sa city hall

Unom ka buwan nga preventive suspension   nagpaabot sa hepe sa Land Appraisal Division sa Cebu City Hall nga si Engracio Lumangtad.

Sa paghikay ning balita, nagpabilin pa si Lumangtad sa National Bureau of Investigation (NBI-7) tungod kay wala pa makapiyansa sa mga kaso nga gipasaka batok kaniya.

P60 mil ang piyansa alang sa temporaryong kagawasan sa suspetsado nga nag-atubang karon og kasong robbery-extortion, kalapasan sa Anti-Graft and Corrupt Practices Act ug kalapasan sa Code of Conduct and Ethical Standards for Public Officials and Employees.

Kini human usab ireklamo sa usa ka Francisco Bontuyan sa barangay Talamban nga nangilkil kaniya og P50 mil bugti sa pagpagawas sa iyang tax declaration.

Walay kalibutan si Lumangtad nga midangop si Bontuyan ngadto sa NBI-7 nga daling mipahigayon og entrapment operation nga miresulta sa pagkasikop niini.

Si Mayor Tomas Osmeña mimando na sa City Attorney’s Office alang sa pagsuspenso kang Lumangtad samtang kini mag-atubang og imbistigasyon sa iyang gihimo.

“He will serve a 6 months preventive suspension, standard man na, of course, he will undergo due process, pero mopusta ko 50-1 he will be dismissed,” sumala sa mayor.

Kung mataktak si Lumangtad sa serbisyo, seguradong wala kini madawat nga benepisyo sulod sa 30 ka tuig niining pagpanarbaho diha sa City Hall.

Sa pikas bahin, ang labaw ni Lumangtad nga si City Assessor Eustaquio Cesa nagduda na kang Lumangtad human masikop sa NBI-7.

“Ang sakto unta diha nga he will be presumed innocent, apan unsa may iyang gilakaw adtong tungora nga office hour man, unya wala pa mananghid nako, so, makaingon ko nga he will be presumed guilty, iya na kanang katungod pagpamatuod nga siya inosente,” sumala ni Cesa.

Karon pa lang nangandam na si Cesa sa iyang habig pagpanalipod sa iyang kaugalingon, tungod kay kini ipaapil sa mayor pagpa-imbestigar isip labaw ni Lumangtad.