4 tinun-an nasudla’g espiritu

Upat ka mga tinun-an sa 1st year ug 4th year sa Badian National High School sa lungsod sa Badian, Cebu  giingong kalit lang nasudlan og dautang espiritu ug nakuyapan atol sa pagtambong niini sa ilang tagsatagsa ka klase kagahapon sa buntag.

Si PO1 Josephine Barriermente sa Women’s Desk sa Badian Police Station nga maoy nag-imbistigar sa maong panghitabo mibutyag dihang nahinabi sa Banat News nga tulo ning maong mga tinun-an 4th year ug usa  ang 1st year.

Subay sa gihimong imbestigasiyon ni PO1 Barriermente ang usa ka babaye nga 4th year ang katapusang nakuyapan kagahapon sa alas 10 pasado sa buntag ug gidala kini sa kombento aron mabenditahan Apan wala mokonpirmar si Fr. Nazario Vocales, kura paruko sa maong lungsod sa alegasyon nga nasudlan kini og dautang espiritu. Hinuon mirekomendar  si Fr. Vocales  nga ipadala sa Badian District Hospital aron makapahuway og tarong.

Matud ni PO1 Barriermente nagsugod ang maong panghitabo niadtong Miyerkules sa hapon dihang ang usa ka babayeng tinun-an sa 4th year sa mao gihapong tunghaan   nakuyapan ug nasundan kini sa laing duha ka tinun-an nga nakuyapan pipila ka minutos atol sa pormal nga pagsugod sa klase kagahapon.

Sa gihimong pagsukitsukit ni PO1 Barriermente wala gyuy bisan usa ka magtutudlo sa maong tunghaan ang mikonpirmar nga nasudlan og dautang espiritu ang maong mga tinun-an hinungdan nga nakuyapan kini tungod kay matud nila posibleng napasmo ug gipanggutom lang ang maong mga tinun-an maoy hinungdan nga nagdaut ang panglawas niini ug nakuyapan.

Samtang gibutyag ni Rudy Celestial, sanitary health inspector sa Badian nga dili pa sila makahimo og dugang pakisusi niini tungod kay sukad kagahapon sa hapon wala pay pormal nga reklamo may labot sa maong panghitabo.

Giangkon hinuon ni Celestial nga nakadawat na sila sa report nga nasudlan og dautang espiritu ang maong pipila ka tinun-an sa Badian National High School.