Ipaubos na sa assessment test ang tanang mga bata sa siyudad sa Sugbu nga mo-enroll sa grade 1 sa publikong mga tunghaan sa dakbayan sumala pa ni Cebu City Schools Division Superintendent Doctor Lorna Rances, samtang nagsugod na ang enrollment niadtong mosugod na sa pagtungha.
Matud ni Rances nga ang mahagbong sa eksaminasyon, ipaubos sa walo ka semana nga curriculum nga magsugod sa buwan sa Abril.
Tuyo niini nga maandam na ang kabataan sa ilang pagtungha sa grade 1 ug dili na maglisod sa ilang leksyon.
“Daghan man gong mga bata nga wala muagi og kinder unya og iipon na nimo sa mga tinun-an nga nakatungha og preparatory, mabiyaan gyud sila, mao usab na ang hinungdan sa ubang kabataan nga dili na ganahan moeskwela kay dili man makaapas sa ubang tinun-an, mao na nga atong gimugna ang 8 weeks curriculum,” sumala ni Rances.
Sa nahisgutang mga semana, tudloan ang mga bata sa pag-ila og numero ingon man sa pagbasa.
Matud ni Rances nga ang mga hanas nga magtutudlo maoy motudlo sa mga bata.
Samtang ang kagamhanan sa dakbayan sa Sugbu giingong mao usab ang mohatag og P50 matag oras nga honorarium ngadto sa mga magtutudlo.
Kapin sa 4 mil ka mga bata sa siyudad ang gipaabot nga mosulod na sa grade 1 ug magpa-enroll alang sa sunod tuig tingtungha.
Nagtuo hinuon si Rances nga pipila lang ka gatos ang mapaubos sa 8 weeks curriculum nga wala makatungha sa day care center o sa preparatory schools.
Sumala ni Rances nga ang nahisgutang programa maoy labing una dinhi sa rehiyon, ug gipaabot nga kini sundugon sa ubang publiko nga mga tunghaan.