Mopahigayon og massive blood-typing ang Cebu City Disaster Coordinating Council (CCDCC) sa kabarangayan sa dakbayan aron dili na unya maproblema ang mga residente kung ugaling adunay nagkinahanglan og dugo.
Matud sa chairman sa CCDCC nga si konsehal Gerardo “Gerry” Carillo nga ang tumong niini mao ang pagsuta sa type sa dugo sa mga mulopyo ug aron dili na unya maglisod ang mga residente sa matag barangay pagpangita sa gikinahanglang dugo panahon sa emerhensiya.
“For example, ako nagkinahanglan ko og dugo, I would know in my barangay kung kinsay parehas nako og dugo, in case of emergency pwede ni nako ma-donor,” sumala sa konsehal.
Nagkanayon si Carillo nga ang mga empleyado sa Cebu City hall maoy unang ipaubos sa blood-typing sa dili pa ang mga molupyo sa kabarangayan.
Nagkanayon ang konsehal nga posibleng masugdan ang pagpatuman sa nahisgutang programa sa sunod buwan kung maandam na ang mga gikinahanglan.
Niingon si Carillo nga ang massive blood-typing maoy kabahin sa pagpangandam sa CCDCC sa mga kalamidad nga posibleng moigo sa siyudad.
“Kahibawo na man gyud ta nga ang siyudad kanunay duawon og mga kalamidad sama sa bagyo, landslide, baha ug uban pa, mao nga mangandam gyud ta,” dugang pasabot sa konsehal.