Mokabat sa 123 ka mga polis sa kalungsoran sa probinsya sa Sugbu ang napakyas pagtunga ug wala kaapil sa miaging tuig sa Gun Proficiency Training nga gipahigayon sa International Defensive Pistol Association.
Apan ang 17 ka mga polis ang girekomendar dayon nga dili hataga’g usa ka adlaw nga suweldo ingon man dili makadawat sa ilang benefits karung tuiga sama sa bunos karung Disyembre.
Si SPO1 Jack Inihao sa Provincial Investigation and Detection Management Branch mitug-an sa mga tigbalita kagahapon nga labihang sukoa ni CPPO Director Sr. Supt Carmelo Valmoria niining mga polis nga wala kaapil sa maong training niadtong milabay'ng tuig bisan paman og libre ang tanan, sama sa pagkaun og snacks.
Nunot niini si Valmoria nimandu kang Supt. Teofilo Siclot, hepe sa PIDMB nga imbestigahon ang 123 ka mga polis ug pasumiteron sa ilang mga tubag nganong wala makaapil sa maong training.
Matud pang SPO1 Inihao sa 123 ka mga polis nga nisumiter sa ilang tubag 30 niini maoy iyang nabasahan pulos nangangkong duna gipamati sa lawas, gubaon ang ilang armas ug ang uban wala kahibalong dunay training niadtong adlawa.
Hinuon 13 kanila ang napasaylo ni Valmoria tungod kay katuuhan gyud ang ilang mga rason samtang ang uban gipangayoan og dokumentong mosuporta sa ilang mga rason. (Rey Pasaporte)