Nakaangkon og samad dinunggaban sa nagkadaiyang parte sa kalawasan ang duha ka mga sakop sa Alpha Kappa Rho human kini gidunggab kagahapon sa kaadlawon diha sa dalan San Jose, barangay Tisa ning dakbayan.
Ang report sa Homicide Section sa Cebu City Police Office nagbutyag nga ang duha ka mga biktima nga sila si Mark Julius Caballes, 27, uban sa ig-agaw niining si Rico Seniagan, 25, pulos residente sa Naya Village Tisa, nag-inom sa maong dapit sa wala pa ang hitabo mga alas 3 sa kaadlawon.
Gikatahong ang mga biktima giingong gikarambol niini ang duha ka mga gituohang sakop sa Tau Gamma Phi fraternity hinungdan nga nadunggaban ang duha ug nagpabilin pa karon diha sa Cebu City Medical Center.
Si Sr. Supt. Patrocinio Comendador atol sa regular nga press conference niini mitug-an nga gihulma na niya ang team nga maglantaw sa maong problema.
“I will create a unit to address this problem. It will came from different police units,” sumala pa niini, aduna kini panagtambayayong sa Homicide ug Theft and Robbery Section.
Maglantaw ang team niadtong mga fraternity nga adunay mga rekord diha sa ilang buhatan.
Gipadayag niini nga ang maong area iya nang gipabutangan og mga beat patrol police gumikan kay aduna nay insidente niini sa nahisgutang dapit sa milabay’ng tuig.
Hinuon ang mga sakop sa Homicide section padayon pang nipalawom sa maong isyu kun tinuod ba gyud nga ang maong insidente may kalambigitan sa fraternity.