Gituohan nga bag-ong natawo ang usa ka puya nga lalaki nga napalgan sa ilawom sa unang tulay sa Mactan Bridge sa Sitio Seaside Barangay Pajo dakbayan sa Lapulapu kagahapon sa buntag.
Matud pa ni SPO1 William Homoc ug PO3 Frederick Eslit sa homicide section sa kapolisan sa Lapulapu nasayran nga usa ka Raymundo Gelig, 48 minyo ug residente sa maong dapit usa ka mananagat maoy nakabangal sa maong bata.
Matud pa ni Gelig nga samtang namaling siya sa maong dapit samtang hunas pa ang dagat kalit siya nakakita ug usa ka bata nga naglutawlutaw sa dagat nga wala nay kinabuhi hinungdan nga iya kining gikuha.
Base sa pamhayag ni Gelig nga ang bata bag-o lang natawo sanglit nagkadugo pa ang pusod niini ug ulo agi sa pagkalambalamba niini sa bato sa dagat.
Si SPO1 Homoc dili usab makakompirmar sa maong patay'ng lawas sa bata kung bag-o ba kini natawo gumikan kay ang mga mananambal lamang ang makatino niini hinungdan nga gidala kini sa Lapulapu District hospital.
Nagduda usab ang kapolisan nga dili gikan sa Seaside Pajo ang naglabay sa maong bata kundi gikan kini sa layo nga dapit ug posibleng naanod kini sa sulog sa dagat. Ang patay'ng lawas sa batang lalaki anaa karon sa lokal nga punerarya alang sa autopsiya nga pagahimoon. (Bong Soriano)