Gamay ray nikuyog sa protesta sa farmers

"Mingaw pa sa tirana" ug ingon sa gilangaw ang pagpahigayon og lihok protesta   sa mga sakop sa militanteng pundok dinhi sa  Sugbu subay sa ilang pagduyog sa pagsaulog sa Mendiola Massacre kagahapong adlawa.

Ang maong kalihukan gisugdan sa mga militanteng pundok mga alas siyete sa buntag gikan sa lungsud sa Minglanilla kagahapon uban sa mokabat lang 600-700 ka mga mag-uuma kuyog usab niini ang sobra 10 ka mga elementary student nga anak sa ubang mga mag-uuma gikan sa ubang lungsud sa lalawigan sa  Sugbu.

Si Arman Perez ang secretary general sa Bayan Muna Central Visayas nga gikahinabi sa Banat News miingon nga napakyas gyud sila sa pagkuha sa gidaghanon sa ilang mga kauban gumikan sa pagpunay og uwan.

Wala matuman ang iyang giingon niadtong wala pay Sinulog nga mokabat sa 4-5 mil ang mouban sa maong protesta.

Hinuon bisan paman niini mapasigarbuhon si Perez kay nadayon gyud ang ilang pag-martsa gikan sa Minglanilla ug Tabunok paingon sa Malacañang sa Sugbu diin nipahigayon sila'g noise barrage sa atubangan bahin niini sulod sa kinse minutos.

Human  niini nidereto sila diha sa Colon Area diin didto nila gitapos mga alas dose na kapin pasado sa udto.

Padayon nilang gipanawagan sa goberno ang pagpalabang na sa hingpit sa House Bill 3059 o naila nga Genuine Agrarian Reform Bill nga giduso ni Kongresista Crispin Beltran sa Anak Pawis.

Gumikan kay para kanila walay pulos ang Comprehensive Agrarian Reform Act gipatuman 21 kapin na ka tuig sukad sa paglingkod ni kanhi presidente Corazon  Aquino.