Ang biktima kinsa nakaangkon og upat ka pinusilan sa nagkadaiyang parte sa kalawasan giila sa kapolisan nga mao si Felix Intapa, 37, minyo, lumad nga taga Bantayanon, Calatrava Negros Occidental ug temporaryong nagpuyo sa barangay Arpili sa naasoy'ng lungsod.
Segun sa report nga gipadangat sa Cebu Provincial Police Office ang biktima gikan sa sulod sa bulangan ug sa iyang paggawas aron unta mosakay sa nagpaabot nga traysikol kalit lang siyang giduol sa luyo sa mamumuno nga nagtaptap sa nawong dayong pusil sa makadaghang higayon nga maoy nakaingon sa iyang kamatayon.
Human mahagba ang biktima sa yuta ang mamumuno yano kaayong naglakaw paingon sa nagpaabot nga laing kauban kinsa nagtaptap usab sa nawong ug mipasirit sa motorsiklo nga gihimong gate-away vehicle.
Ang kapolisan nga ningresponde sa nahitaboan nakarekober og upat ka empty shells ug usa ka buhing bala nga iya sa .45 nga pistola nga gituuhang iya sa mamumuno.
Matud pang po2 Hannibal Larida nga nahinabi sa Banat News nga sa pagkakarun blangko pa sila sa pag-ila sa mipusil patay sa biktima.