Hepe, 5 ka mga sakop imbestigahon – Valmoria

Giduso na ni Cebu Provincial Police Director Sr. Superintendent Carmelo Valmoria sa buhatan sa Police Regional Office (PRO-7) ang iyang rekomendasyon sa pagdisiplina batok sa lima ka mga polis  sa lungsod sa Cordova   gumikan sa ilang pagpamakak.

Ang girekomendar nga lima ka police  mao sila si Chief Inspector Bonifacio Tecson, ang hepe sa Cordova Police uban sa iyang mga sakop nga sila si  SPO1 Ebenezer Cadilina, SPO1 Henry Bentulan-Amores, PO2 Arnel Resente ug PO1 Arthur dela Fuente Santillian human ang kapulisan sa Cordova namakak ngadto ni Mayor Adelino Sitoy, media ingon man sa mga imbestigador sa  CPPO nga ilang gipadala labot sa pag-eskapo sa usa ka piniriso.

Una niini ang kapulisan sa lungsud sa Cordova gikatahong gi-eskapuhan sa usa ka drug suspect nga si Joseph Rosane  niadtong Disyembre 27 sa  miaging tuig.

Samtang gidala sa kapulisan sa Cordova ang suspek sa Regional Trial Court  sa Lapu-Lapu sa pagpasaka unta niinig kaso apan nilayat ug nidagan ang suspect hinuon nadakpan lang kini paglabay sa tulo ka oras.

Si Valmoria nga gikahinabi sa mga tigbalita nagkanayon nga wala siya matagbaw sa reports nga giduso ni SPO1 Henry Amores ang chief investigator sa kapolisan sa lungsud sa Cordova labot sa rekomendasyon nga sila si PO2 Arnel Resente ug PO1 Arthur dela Fuente Santillian, ipaubos lang sa supervisory training.

Si Valmoria nagkanayon nga sa  rekomendasyon nga iyang giduso sa PRO-7, si   Tecson mag-atubang sa  imbestigasyon tungod kay iya kining command responsibility  ug  serious neglect of duty human kini nipirma sa incident report  nga wala gyud mobasa sa report.

Samtang sila si SPO1 Amores ug SPO1 Cadilina imbestigahon usab tungod kay di kamao sa  ilang imbestigasyon, mag-atubang usab og kaso si   Resente  ug  Santillian  og  infidelity of custody of personnel.

Matud ni Valmoria  bug-at   kaayo ang kaso ug dili na sa iyang hurisdiksyon tungod kay ang usa ka provincial director igo lang maka-impose sa penalty nga 15-30 ka adlaw.