Amahan gitabangan sa misis ug anak

Nakaangkon og bukol sa ulo ingon man pagkasamad sa walang bukton ang usa ka amahan human kini gitabangan og bunal ug dunggab sa iyang kaulingong asawa ug anak didto sa dakbayan sa Danao kagahapong adlawa.

Si SPO4 Jose Salingua sa Danao Police Station mitug-an sa Banat News nga ang biktimang si Wilfredo Delfueda, 47, taga barangay Sabang,  nagpa-blotter batok sa iyang anak nga si Junifer Delfueda, 18, kinsa maoy midunggab kaniya didto sa ilang panimalay mga alas diyes pasado sa buntag human sa pagpakig-away sa asawang si Sandilina, 43.

Sumala pa ni SPO4 Salingua nga ang kaguliyang sa banay’ng Delfueda nahitabo  sa dihang gibunalan  og bangko sa  asawa ang  buko-buko ni Wilfredo.

Human magkalalis ang magtiayon gumikan kay ang banang si Wilfredo  wala mointrigo sa suweldo sa pagtrabaho niini isip usa ka cady sa Club Filipino Golf Course diha sa ilang dapit sumala pa nga napungot ang asawa ug gibunalan og bangko  si Wilfredo  nga naglagot ug mibalos pinaagi sa pagtuok sa liog ni Sandilina dungan sa pagsukmag sa nawong.

Ang anak nga si Junifer nga  nakakita sa maong hitabo nga gituok ang iyang inahan ug gisukmag sa iyang amahan wala makaagwanta ug mitabang.

Si Junifer mikuha  og kutsilyo sa kusina ug gidunggab ang amahan apan nakabantay kini hinungdan nga ang walang siko niini mao ray nasamad tungod kay naigo sa pul-an sa kutsilyo.

Ang suspetsado human sa pagpanunggab dali usab kining nakasibat ug wala na gyud igkita pag-abot sa kapolisan samtang ang magtiagyon nag-abot kini sa presinto sa  Danao diin ang bana nagpa-blotter sa iyang mga bun-og ug samad.

Nagpa-blotter usab sa Women’s desk ang asawa gumikan sa pagkulata sa iyang bana ngadto kaniya.

Ang magtiayon nagbaharay nga mopasaka’g  kaso sa usa’g usa nunot sa ilang mga bun-og, apan ang kapulisan nitambag sa duruha nga mobalik lang una sa kapitan aron ilang hapsayon  ang problema sa pamilya.