Dunay klase ugma

Magklase gyud ang tanang pampubliko nga mga tunghaan sa dakbayan sa Sugbu ugmang adlawa taliwa sa hangyo sa konseho sa siyudad nga isuspenso kini.

Matud ni Cebu City Schools Division Superintendent Doctor Lorna Rances nga kini maoy ilang nasabutan uban sa mga supervisor sa nagkadaiyang tunghaan.

Ang City Council pinaagi sa naaprubahang resolusyon naghangyo sa Department of Education nga hatagan og higayon ang mga tinun-an nga makapahuway human sa Sinulog.

Apan niingon si Rances nga wala na kinahanglana ang pagsuspenso sa klase tungod kay pipila lang ka mga tinun-an ang mosalmot sa grand parade karong adlawa.

Gawas niini niingon si Rances nga wala usab sila makadawat og kopya sa nahisgutang resolusyon sa konseho nga naghangyo pagsuspenso sa klase.

Giklaro hinoon sa City Schools Division Superintendent nga mahimo ra nga mopalta sa klase ugmang adlawa ang mga tinun-an nga moapil sa festival.

Apan nidugang si Rances nga gikinahanglan usab niini nga mo-make up sa adlaw’ng Sabado aron ilang makompleto ang gikinahanglang mga adlaw sa tingklase.

Gipadayag hinoon sa City Schools Division Superintendent nga mas pabor ang mga school supervisor ingon man ang mga principal nga magklase ugmang adlawa.

“Ako man gyod nga gikunsulta ang mga supervisor nato ug ang mga principal, ganahan sila nga magklase kay sa magbayad og laing adlaw,” sumala pa ni Rances.

Sa pikas bahin, gipahibawo usab ni DepEd-7 assistant regional director Doctor Recaredo Borgonia nga anaa ra sa mga schools division superintendent sa probinsya sa Sugbu kung ila ba nga suspensuhon ang klase sa mga tinun-an ugmang adlawa.

Apan nakasiguro si Borgonia nga duna gyoy mga tinun-an nga dili makatunga sa ilang klase ugma ilabi na niadtong kabataan nga moapil sa Sinulog festival karong adlawa.

Apan gipadayag hinoon ni Borgonia nga mahimong i-exempt sa klase ang maong mga tinun-an apan gikinahanglan usab nga kini tapakan sa adlaw’ng Sabado.