Gireklamo sa pag-umangkon ni Bise Mayor Adoracion Cabrera sa lungsod sa Sta. Fe, isla sa Bantayan ang bilas ni Mayor Jennifer Ilustrisimo nga nanagpa sulod sa duha ka higayon sa walay igong hinungdan.
Nagpa-blotter sa Sta. Fe Police Station si Edmundo Cabrera, kagawad sa barangay Talisay ug pag-umangkon ni bise mayor Cabrera human kini mireklamo nga gisagpa ni Renato Esgana, bilas sa mayor.
Matud ni PO1 Jessie Illustrisimo, desk officer on duty sa Sta. Fe Police Station nagpa-blotter ang biktima tungod sa bun-og niining na-angkon sa tuong aping human gisagpa makaduha ka higayon.
Gibutyag ni Cabrera nga nahitabo kini atol sa kapistahan sa ilang patron Señor Sto. Niño sa lungsod niadtong milabay’ng Miyerkules dihang nagpakaon og libreng mga linuto nga kinhason sa lungsod niadtong higayona tungod sa gisaulog niining kinhason festival.
Pagka-ala una sa hapon nagkasugat si Esgana ug Cabrera sa plaza sa maong lungsod apan kalit lang gisagpa sa suspek ang biktima ug una pa nangutana kun gigamit ba niini ang iyang pangalan pagpangayo og kinhason apan dihang mihimakak ang biktima giusban na usab kini og sagpa hinungdan nga nagpa-blotter tungod sa paglagom sa iyang aping.
Gibutyag ni Cabrera nga gitun-an pa karon sa ilang pamilya ang posibling pagpasaka og kaso batok kang Esgana tungod sa gihimo niining pagpanapat kaniya sa walay igong hinungdan.
Nasayran nga ang pamilyang Illustrisimo ug Cabrera kontra partido sa milabay’ng piniliay sa maong lugar diin si Cabrera mao kini runningmate sa napilde nga mayoralty candidate Domingo Zaspa.