NFA rice dealers misulat ni PGMA labot sa korupsiyon sa opisina’s NFA-7

Mireklamo ngadto ni Presidente Gloria Arroyo ang pipila ka mga NFA rice dealer dinhi sa Sugbu may labot sa gipasangil niining grabeng korupsiyon karon sa buhatan sa NFA-7 nga maoy nakaingon sa pagnihit sa suplay ug pagsaka sa presyo niini gikan sa P18 kada kilo nahimo na kini karong P22.

Ang licensed NFA rice dealer nga si  Bartolome M. Cosido pormal nga mipadala og suwat reklamo ngadto kang Presidente  Arroyo nga iyang gi-mail niadtong Nobiyembre 19  nga nanawagan og imbestigasyon sa maong anomaliya.

Gisaysay ni Cosido sa iyang suwat reklamo ngadto sa presidente nga dunay usa ka dakong negosyante dinhi sa Sugbu ang kunsabo sa pipila ka mga opisyal sa NFA nga maoy nagkontrolar sa daghang mga stock sa NFA.

Kini maoy hinungdan nga silang mga dealer  mahatagan na lang og tag 100 ka sako nga suplay sa NFA matag semana nga tag P800 ang sako ug ibaligya nila sa tag P18 ang kilo ug duna pa gani ubang mga semana nga wala silay suplay.

Matud ni Cosido nga mapugos sila pag-angkat og NFA rice ngadto sa maong magpapatigayon apan sa tag P950 na ang sako hinungdan nga mabaligya na usab kini og tag P22 ang kilo.

Alang niya dako kining maong binuang tungod kay wala naman matuman ang katuyoan sa gobyerno nga ipabaligya ang NFA rice sa tag P18 ang kilo aron makaabot niini kadtong mga kabus.

Ang laing reklamo nga gipaabot niya sa presidente mao ang pagpugos nilang mga NFA dealer sa pagpagasto og P500  alang sa pagpalit og box nga sudlan sa NFA rice nga papintalan og puti og patatakan sa NFA nga logo ug ingon man ang pagpalit og NFA official tag ug letterhead niini.

Samtang karong bag-o gireklamo na usab nila ang pagpamugos sa pipila ka opisyal sa NFA-7 og paamot og P750 nga giingong alang sa gastuhan sa seminar sa presidente sa Grain Retailers Confederation (Grecon).

Nanghinaot si Cosido nga aksiyonan sa presidente ang mao niyang reklamo human una na niya kining giduso sa buhatan sa NFA-7 apan wala gyoy aksyon nga gihimo.