Balikbayan midagsa para Sinulog

Misobra na karon ang mga balikbayan ingon man mga lokal nga turista ang gustong motan-aw libre ugmang adlawa sa mga dancing inmates sa Cebu Provincial Detention and Rehabilitation Center (CPDRC) nga mosayaw sa Sinulog diha sa maong bilanggoan.

Si Byron Garcia, ang consultant on security sa Kapitolyo nga gikahinabi sa Banat News mitug-an nga nagka-problema sila karong mga panahuna gumikan kay gikan sa 200 ka mga tawo sa matag show misobra og 40 ang nagpa-reserve.

Nunot niini nihimo sila'g mga kausaban nga ang sobra nga 40 ila nalang bahinon atol sa upat ka hugna nga show uban na niini ang 50 ka mga sakop sa media.

Gumikan kay kagahapong adlawa naghulat usab siya sa go-signal ni Bokal  Agnes Magpale ang tsirman sa turismo sa lalawigan human adunay laing 300 ka mga balikbayan ang nagpa-rehistro usab.

Matud pa niini nga ang maong pasundayag sugdan sa unang hugna mga alas diyes sa buntag ug ang ikaduhang hugna alas dos sa hapon samtang ang laing hugna sa alas kwatro sa hapon ug ang laing oras nga ila pang gihan-ay alang niadtong ubang mapuno.

Atol sa maong kalihukan ipakita una ang diyes minutos nga pagsalida sa Culture of Discipline sa maong bilanggoan ngadto sa mga mosaksi una pa mosayaw sa Sinulog sulod sa 40 minutos.

Dugang pa niini nga walay bayad sa mga balikbayan ingon man sa mga lokal nga turista ang maong pasundayag diin kuhaon sila og tourist bus nga manukad diha sa provincial Capitol.