Polis nanion, namukbok

Hayan mag-atubang og kasong administratiba ang usa ka bagitong polis kinsa gipasanginlang nanion og armas sa usa ka off-duty nga gwardiya diha sa dalan Magallanes sa may Carbon Market niadtong milabay’ng gabii.

Ang maong polis giilang si PO1 Irvin Adling, sakop sa Regional Mobile Group nga nadestino diha sa Carbon Police Station ug karon gikustodiya na sa hepe sa maong buhatan samtang dunay gihimong imbestigasyon.

Usa ka Elias Taboco, 40, usa ka off-duty nga gwardiya ug residente sa Kinasang-an, Pardo ang mipasangil nga gitiunan ug gibitad siya sa maong polis ug ingon man gibukbok sa armas niini sa walay igong hinungdan diha sa usa ka ngitngit nga bahin sa maong kalsada.

Si Supt. Eliseo Castronuevo,hepe sa Carbon Police Station sa pakighinabi sa Banat News mitug-an nga tungod sa alegasyon ni Taboco iyang gipadisarmahan ang maong polis ug gipailawom sa liquor test kagabii, apan migawas nga negatibo kini.

Si Castronuevo nagkanayon padulong na pauli si Adling gikan sa iyang duty niadtong tungura.

Sa alegasyon sa maong polis nga dihay usa ka babaye ang miduol kaniya ug nagpakitabang kay ang cellphone niining gikawat nakit-an niya nga diha gidisplay sa sidewalk ni Taboco.

Sa pagresponde ni Adling gikatahong nagkatinubagay ang duha ug diha na mahitabo ang giingong panag-ilogay sa duha sa armas. Si Adling nagkanayon nga nagpaila siyang polis apan giilog ni Taboco ang iyang armas hinungdan nga naglayog sila hangtud nga nakaluhod si Taboco ug iyang nabukbukan ug gidala sa presinto.

Apan si Taboco sa iyang bersyon mitug-an nga kalit lang siyang giduol ni Adling ug wala magpailang polis dayong bitad kaniya diha sa ngitngit hinungdan sa nahitabong panag-ilog nila sa armas.

Matud pang Castronuevo dili niya mahimong arestuhon si Adling kung walay pormal nga reklamo si Taboco ug ikaduha, si Adling igo rang mitubag sa alarma.

Samtang ang babayeng gikuyogan ni Adling dali usab nga midagan palayo tungod sa nahitabo ug wala na makuhai sa iyang pangalan.

Aron mahikay ang reklamo, giawhag ni Castronuevo si Taboco pagsang-at og pormal nga kaso ngadto sa CCPO o ba kaha sa Police Regional Office 7.

Si Sr.Supt. Patrocinio Comendador, director sa Cebu City Police Office nagkanayon nga dili sakop sa ilang buhatan ang administratibang hurisdiksyon si Adling kundili sa RMG.

Apan irekomendar ni Comendador nga ilabay gawas sa CCPO ang maong polis samtang gipaabot pa ang resulta sa imbestigasyon.