'Mipatay' sa polis 'sikop

Nadakpan kagahapon sa mga sakop sa Mandaue City Police Office ang usa sa tulo ka mga tulisan nga namusil sa duha ka polis sa Mandaue nga mipatay sa usa ug miangol sa kauban.

Nadakpan sa team nga gipanguluhan ni Sr. Insp. Renerio Cortes ang usa sa tulo ka suspek nga si Lauro Lumapas alyas Joegro atol sa ilang follow up operation sa Imus road, barangay Sikatuna, duol sa Department of Education.

Laing suspek sa pagpatay kang SPO1 Pedro Sucion ug miangol ni PO2 Darius Conejos nga nailhang si Leo dela Victoria ug Niño Macasero pabilin pang gawasnon ug padayong gipangita sa kapolisan.

Si SPO1 Calatino Bataluna Jr. miasoy sa Banat News nga nakuhaan si Lumapas og duha ka .38 kalibre nga rebolber nga gipasok sa unlan nga iyang giunlanan sa dihang nahitabo ang pagdakop kaniya sulod sa lawak kauban ang usa ka Jonathan.

Sumala pa ni SPO1 Bataluna nga gisuhid sa kapolisan sa MCPO ang mga tagoanan sa grupo ni Lumapas sa Lapulapu, Mandaue ug Liloan, apan nakadawat sila og impormasyon nga aduna kini hideout sa Imus road hinungdan nga dali nila kining giadto.

Si Lumapas gitanggong karon sa karsel sa MCPO.

Ang kapolisan sa Mandaue nagkanayon nga andam na nilang ipasaka ang kasong murder, frustrated murder ug robbery batok nilang Lumapas, dela Victoria ug Macasero.