Bail now pay later suportado

Gihangop ni Cebu City jail warden Efren Nemenio ang bag-ong programa karon sa Bureau of Jail Management and Penology (BJMP).

Kini mao ang “Bail Now, Pay Later” diin piyansahan sa BJMP ang mga piniriso nga nakahimo lang og gagmay nga salaud.

Gawas sa pagpiyansa, ang BJMP usab ang mangita og trabaho alang sa mga binilanggo aron duna kini ikabayad ngadto sa nahisgutang ahensya.

Tumong sa maong programa sa BJMP mao ang pagpaluag sa naghuot na nga mga bilangguan sa tibuok kapupud-an.

Sa samang higayon, kini giingong maghatag usab  og paglaum sa mga piniriso nga magbag-o sa ilang kinabuhi.

Ang “Bail Now, Pay Later” giingong giplantsa na sa BJMP ug kini gikatahong una nga ipatuman didto sa kauluhan.

Gikinahanglan pa hinuon sa usa ka bilanggoan ubos sa BJMP nga makig-alayon ngadto sa lokal nga kagamhanan, non-governmental organizations, religious organizations ug ubang institusyon alang sa hingpit nga pagpatuman niini, aron matabangan ang ahensya pagpangita og kasudlan nga trabaho sa mga inmates.

Base sa BJMP statistics moabot sa 11,563 ka mga inmates lukop nasod ang giingong kwalipikado sa “Bail Now, Pay Later” program.