Gipusil patay ang usa ka mag-uuma sa wala mailhing tawo sulod sa ilang pinuy-anan kagahapon sa kaadlawon diha sa bukirang bahin sa Monte Alegre, lungsod sa Tuburan.
Usa ka Ian Temblor, silingan sa biktima ang mi-report sa ilang barangay kapitan kabahin sa maong hitabo.
Duha ka samad pinusilan sa ulo, usa niini diha sa agtang ang naangkon sa biktimang si Yunde Bacoli, 27, minyo ug residente sa nahisgutang lugar.
Si SPO3 Edgar Dumangon mitug-an sa Banat News nga si Temblor mireport kang Kapitan Lodovico Roquero human niya mapalgi ang biktima diha sa higdaanan sulod sa gipuy-an nga patay na ug dihay duha ka samad pinusilan sa ulo nga maoy nakaingon sa kamatayon sa biktima.
Narekober sa kapolisan diha sa crime scene ang duha ka empty shells sa .45 pistol ug gituuhan nga maoy gigamit sa wala mailhing mamumuno.
Matud ni SPO3 Dumangon nga sa pagkakaron blangko pa sila sa ilang imbestigasyon kun kinsa ang responsable niini sanglit nagpadayon pa man ang dugang imbestigasyon sa maong hitabo.
Gisusi usab sa kapolisan ang background sa biktima kun wala bay gikakontra sa ilang lugar.
Ang patay’ng lawas sa biktima anaa na karon sa health center sa Tuburan samtang gitakdang ipaubos sa awtopsiya .