Ipaubos sa subsub nga seminar ang kapulisan sa kalungsoran dinhi sa Probinsya sa Sugbo may labot sa hustong mga pamaagi pagpatuman og pag-serve nila sa warrant of arrest ug uban pang aspeto pagsikop nila sa mga suspek.
Si Regional State Prosecutor Llena Ipong maoy nakahunahuna niining maong lakang human kini masagmuyo gumikan sa kadaghang mga kaso gikan sa kalungsoran ang nabasura lang diha sa ilang buhatan.
Iyang nasuta nga nagumikan kini sa kakulang og kabang-kaagan sa kapulisan sa kalungsoran sa probinsya pagpatuman sa hustong pamaagi sa warrantless arrest, search and seizure ug ang hustong pag-apply sa search warrant.
Kini maoy hinungdan nga nahunahuna-an ni Ipong ang pagpahigayon og seminar sa mga polis sa kalungsoran aron mahatagan og hustong kahibalo ang maong mga polis pagpatuman niini aron dili moresulta sa pagkabasura ang mga kaso nga gisang-at gumikan lang sa teknikalidad.
Ang kapulisan sa lungsod sa Tuburan maoy gitinguha ni prosecutor Ipong nga mauna og paubos og seminar dayun sundan kini sa mga sikbit nga kalungsoran.
Hinuon gitakda pang pangitaan og hustong petsa ang gitakda niyang pagpaubos og seminar sa kapulisan sa maong lungsod.