Bala miigo sa 11-anyos
Kritikal ang kahimtang sa 11-anyos nga batang babaye human maigo sa bala sa kalibre .38 nga rebolber nga giduwaan sa 12-anyos nga batang lalaki didto sa barangay Basak, dakbayan sa Lapulapu atol sa pagsugat sa Bag-ong Tuig.
Sa imbestigasyon ni SPO2 Rolito Jumao-as sa Homicide Section sa Lapulapu, nasayran nga mga alas- 12:15 niadtong Enero 1, giduwaan sa 12-anyos ang rebolber nga gipanag-iya sa iyang amahan samtang sulod sa ilang balay
Sa dihang gibadlong sa inahan, wala kini mopatuo hinungdan nga gitambagan kini nga kuhaon ang mga bala. Apan wala makabantay ang inahan nga may nahibilin nga bala.
Sa dihang ibutang sa bata ang rebolber, nabusdak kini hinungdan nga mibuto ang nahibiling bala ug naigo ang 11-anyos niining silingan nga bag-ong naabot.
Gidala sa Mactan Doctor’s Hospital ang 11-anyos, samtang ang 12-anyos gipaubos sa kustodiya sa Department of Social Worker and Development.
Si Insp. Ma. Aurora Rayos sa Women’s Desk sa Lapulapu nagkanayon nga pasakaan nila og kaso ang mga ginikanan sa bata tungod sa pagtugot niini nga paduwaan ang rebolber nga mobuto.
Apan ang mga ginikanan sa 11-anyos walay planong mokiha kun ang mga ginikanan sa 12-anyos moabaga sa gastuhan pagpatambal sa bata.
- Latest
- Trending
