Sinagop sa kapitan naghikot habol sa liog

Sinagop sa barangay kapitan nga 14 anyos nga batang babaye nga tinun-an sa grade 3 nagpakamatay pinaagi sa paghikot og habol sa  iyang liog atol gyud sa Bag-ong Tuig diha sa barangay Canduawan, lungsod sa Tabogon.

Napalgan na lang nga nagbitay ug wala nay kinabuhi  si Razel (tinuod nga ngalan gipugngan), kasamtangan nagpuyo sa balay sa kapitan sa nahisgutang barangay nga si Florendo Quinain.

Si PO1 Aldwin Manlangit sa Tabogon Police, mitug-an sa mga tigbalita  nga si Razel nianang alas 12 pasado sa miaging adlaw nagtan-aw pa kini og pasundayag sa noontime show sa ABS CBN.

Niadtong tungora si Razel kalit lang migawas sa balay sa kapitan ug wala na kini makabalik.

Matud ni PO1 Manlangit nga nagtuo ang kapitan nga milakaw si Razel ug miadto sa iyang higala.

Sa pagka- alas 3 sa hapon si Razel napalgan nalang kining nagbitay diha sa payag nga gamay nga gipanag-iya usab sa kapitan  duol sa panimalay  nga naghikot og habol diha sa iyang liog nga maoy nakaingon sa hinanali niining kamatayon.

Midugang si PO1 Manlangit  sa pagkakaron wala pa silay kasayuran kun  nganong naghikog  ang maong bata ug gani mismo ang kapitan wala gyud masayod kun unsay hinungdan sa iyang pagpakamatay.

Matud pa, ang mga ginikanan ni Razel dugay nang nagkabuwag ug didto kini gipapuyo ni   Quinain kinsa mao na usab ang nagpatungha sa maong bata sa elementarya.