Gipaalerto na usab karon sa taga Visayan Electric Company (Veco) ang ilang mga kawani aron bantayan ang mga linya sa kuryente gikan sa posibleng pag-brown out gumikan sa mga pabuto inig sugat sa Bag-ong Tuig.
Si Ethel Natera, tigpamaba sa Veco nagkanayon nga usa sa gikabalak-an nilang makamugna og brownout mao ang mga dagkong pabuto sama sa kuwitis ug uban pang matang sa pabuto nga molupad sa kahanginan.
Kini tungod kay sa panahong masangit kini sa linya sa kuryente ug mobuto, may dakong kalagmitan nga mapaksit ang kuryente unya makadikit kini sa ubang linya ug mo-grounded hangtod na mapawong ang kuryente.
Matud pa ni Natera nga sa milabay’ng Pasko mao gihapoy gihimo sa ilang mga trabahante hinungdan nga way nahitabong pagkaputol sa serbisyo sa suga niadtong higayona.
Kini pinaagi sa pagbadlong niadtong mga tigpabuto og kuwitis nga kinahanglang adto magpabuto sa hawan nga lugar nga halayo sa mga poste ug linya sa kuryente.
Kaabag usab sa maong gimbuhaton sa Veco mao ang mga opisyal sa barangay sa pagpanguna sa mga kapitan kauban ang mga barangay tanod.
May mga lugar nga gipatuman gyud ang “firecracker zone” diin sa maong mga lugar adto makapabuto og mga rebentador ug lakip usab niini ang pagpamaligya og pabuto.
Gituohan nga mas daghan ang mopabuto inig sugat sa Bag-ong Tuig itandi sa milabay’ng Pasko, matud pa ni Natera.