Eskandalo sa City Hall

Nasakpan sa usa ka  tinugyanan sa Mars Communication   sa Cebu City Hall ang usa ka sakop sa Mayor’s Management Team  (MMT) nga nakighinalukay sa iyang giingon nga uyab sulod sa City Accounting Office.

Kini atol sa pagpahigayon niini og overtime work usa ka gabii sa miaging semana kinuyugan sa iyang hinigugma, nga giingong wala mananghid ug magpahibawo sa guard on duty nga maoy giingong Standard Operating Procedure kon SOP.

Ang MMT gipasigarbo ni Mayor Tomas Osmeña tungod kay kini mga hinashasan ug piniling mga empleyado ug pulos usab mga cum laude graduate.

Ang Mars personnel nga nakakita sa giingong matam-is nga hinalukay sa duha ka managhigugmaay daling mitaho ngadto sa mga guwardiya aron kini masusi.

Wala matino sa blotter sa guwardiya kun unsay sunod nga nahitabo apan laing communication personnel sa city hall ang mitaho nga nakit-an niini ang duha sulod sa nahisgutang buhatan nga gipalong na ang mga suga.

Apan gidudahan sa mga guwardiya nga nahinabi sa Banat News nga dunay gihimong  milagro ang duha  sulod sa Accounting Office tungod kay giingong molanat pa og pipila ka mga gutlo una nanggawas ang duha.

Ang chairman sa Committee on Laws, Ordinances, Public Accountability and Good Government sa City Council, konsehal Edgardo Labella mihulagway sa maong matang sa buhat nga “disgraceful ug immoral conduct.”

“It would fall under the violation on the Civil Service Rule and also in the Code of Conduct and Ethical Standards of Public Officials and Employees. It would perhaps, I don’t know the exact fact of the case, but if they did it inside the workplace and it is done in a passionate manner, I think there is a provision on disgraceful and immoral conduct,” sumala  pa sa konsehal.

Midugang si Labella nga mahimong masilotan ang kawani sa pagkasuspenso og unom ka buwan o matangtang ba hinoon sa serbisyo ubos sa Code of Conduct and Ethical Standards.

Nasayran nga ang nahisgutang sakop sa MMT, wala na mo-report sa trabaho diha sa City Hall sukad o human sa nahisgutang hitabo.

Ang Banat News nanawag sa buhatan sa MMT ug nasayran nga ni-leave ang maong kawani apan giingong pabilin pa kining konektado sa City Hall.