Armas ni Aves ‘mipatay’ ni Kusaka

Armas nga narekober gikan sa posesyon ni Aristotle “Ares” Aves kinsa gipasanginlang ‘hitman’ sa Alpha Kappa Rho ug karon gipasanginlan nang miyembro sa ‘guns-for-hire’ nagamit sa tulo ka krimen dinhi sa Metro Cebu lakip na niini ang pagpatay sa Hapones nga si Hiroshi Kusaka niadtong Nobiyembre.

Kini maoy gibutyag kagahapon ni Sr. Supt. Jose Jorge Corpuz, regional officer sa Criminal Investigation and Detection Group-7 kinsa maoy lead agency sa imbestigasyon sa mga high-profile murders dinhi sa Sugbu.

Sumala pang Corpuz base sa nigawas nga resulta sa ballistics examination sa PNP Regional Crime Laboratory-7 nigawas nga ang armas nga kalibre .45 pistola nga nakuha gikan kang Aves niadtong siya gidakop sa Pier 8 niadtong Disyembre 3 nagamit sa krimen.

Kini human masuta nga nag-matched ang nakuhang mga basiyo sa tulo ka mga pagpatay nga pulos gigamitan og .45 kalibre pistola diha sa armas ni Aves.

Sumala pang Corpuz nga dako kaayong kalamboan sa dagan sa imbestigasyon sa pagpatay kang Kusaka, Wilson Yu ug Roland Teves kinsa gipatay sa wala mailhing mga lalaking nagmotorsiklo pipila na ka bulan ug tuig ang nakalabay.

Si Kusaka gibanhigan sa duha ka lalaking luwan og kolor itom nga motorsiklo diha sa eskina sa dalan Plaridel ug G.Ouano sa dakbayan sa Mandaue samtang kini padulong sa Mactan Cebu International Airport.

Samtang sa pagpatay kang Wilson Yu niadtong Oktobre 6 tuig 2005 sa hapon sa sitio Pilit sa barangay Cabangcalan dakbayan sa Mandaue tulo ka wala mailhing mga lalaki ang namanhig.

Si Yu nga usa ka negosyante ug supporter ni Presidente Gloria Arroyo isip campaigner kaniadto, mao usab ang kanhi presidente sa Kiwanis Club-Cebu chapter.

Niadtong milabay’ng Pebrero, usa ka Roland Teves, ang gipatay atubangan sa iyang mabdos nga kapuyo diha sa Pier 6 aron pagsugat sa usa ka tawong giingong iyang gikasabot pinaagi sa text, apan gisugat siya og usa ka lalaki, gipusil makadaghang higayon diha sa lawas ug sa tangkugo, patay nang midangat sa Cebu City Medical Center si Teves.

Sa maong mga krimen, ang kapolisan pulos nakarekober og mga basiyo sa kalibre .45 ug gipailawom na sa mga ballistics test.

Gisusi ug gipalig-on pa sa kapolisan ang mga kaso ug ang mga motibo sa pagpamatay apan si Corpuz mipasalig nga sa dili pa matapos ning semanaha posibleng makapasaka na sila og kaso.

Si Chief Insp. Romeo Daguno and chief ballistician sa PNP Crime Laboratory sa pakighinabi sa Banat News nga daghang mga teknik nga ilang gigamit pag-eksamin sa mga basiyo ug sa armas nga ebidensya.

“Kahit pagpalit-palitin man nila ang barrel maa-identify pa rin natin,” asoy pang Daguno.

Ning bag-uhay lang, siyam ka krimen ang gilambigit sa usa ka pistolang gitahan sa usa sa mga suspek nga kaubanan sa “guns-for-hire” dinhi nga gikatahong maoy gigamit ni Aves.

Si Aves ug mga kaubanan daan nang mihimakak sa mga alegasyon batok kanila.