Human sa pagpahigayon sa barangay ug SK-election gipangandaman na usab karun sa Commission on Election (Comelec) ang pagpahigayun sa laing continuing registration pagpangandam sa 2010 Presidential Elections.
Gipahibalo ni Comelec-7 Regional Director Atty. Rene Ray Buac atol sa interview sa mga tigbalita nga ang laing hugna sa continuing registration pormal nga sugdan karong petsa 2 sa bulan sa Enero sa sunod tuig.
Giklaro sa direktor nga ang maong continuing registration matapos unya pa sa bulan sa Disyembre sa tuig 2009.
Matud ni Buac nga pagkakarun ilaha nang gisugdan og asikaso ang tanang mga gikinahanglanon nga mga kagamitan alang sa pagpang-rehistro sa mga bag-ong botante aron makabotar sa pinili-ay sa tuig 2010.
Nunot niini giawhag ni Buac ang publiko ilabina dinhi sa Central Visayas nga mokooperar pinaagi sa pagsayo og parehistro diha sa lain laing Comelec office sa kalungsoran ug dakbayan aron malikayan ang paghuot atol sa deadline unya niini.
Gihimong basihanan sa direktor ang nasinati nga grabeng kahasol ug paghuot sa mga niparehistro alang sa nilabay’ng barangay ug SK-election.
Gipasabot ni Buac nga ang bulan sa Disyembre sa tuig 2009 nga maoy deadline sa registration gitagana kini alang niadtong magpangidaron og 18 anyos atol sa adlaw ug sa dili pa ang eleksyon.