Lalaki napaig sunog sa Naga

Usa ka lalaki ang napaig human naapil og kasunog sa  iyang balay diha sa barangay Lutac dakbayan sa Naga niadtong milabay'ng gabii.

Sa report nga gihatag sa Bureau of Fire Station sa dakbayan sa Naga giila ang biktima nga si Jomark Abellanosa, residente sa maong dapit kinsa nakuykuyan  sa   balay niini atol na sa clearing operation.

Sumala pa sa imbestigasyon ni FO1 Frederick Gilbert Amancia kinsa maoy imbestigador sa maong insidente ang biktima natulog niadtong tungura ug wala makamatikod sa nagdilaab niining panimalay.

Nasayran usab nga wala dayon kagawas ang biktima tungod kay nalibutan og mga iron grills ang mga bintana niini   ug gituuhang napoot sa bagang aso hangtud nga nakuyapan ug naapil og kasunog.

Ang panimalay gipanag-iya ni Marcelino Abellanosa, amahan sa biktima samtang gibana-banang dili mominos P100,000 ang danyos sa maong sunog.

Si barangay konsehal Juanita Gesman sa barangay Lutac maoy gikatahong mitawag sa estasyon human makamatikod sa pag-ulbo sa kalayo diha sa maong dapit.

Base sa gitug-an sa mga kabanay sa biktima, diha magsugod ang kalayo sa kusina ug mikatap padulong sa sala ug ngadto na sa tibuok balay.

Nasuta usab nga electrical misuse ang hinungdan sa pag-ulbo sa sunog.