Hingpit nang gitalikdan ni Lahug Barangay Kapitan Marry Ann Delos Santos ang iyang tinguha sa pagpapili isip presidente sa Association of Barangay Council Federation.
Kini maoy ikaduha ug giingong katapusang pagsibog na sa kapitan sa maong tinguha, dili pa lang dugay si kapitan George Rama sa barangay Basak San Nicolas miawhag kaniya pagbalik og kandidato.
Si Kapitan Delos Santos nga gikahinabi sa Banat News mipadayag nga nipasabot na siya sa iyang mga kaubanan sa opposition nga lisod na kaayo ang maong lakang.
Gumikan kay samtang sila naglantaw lang una nga modugangan pa ang ilang 13 ka mga numero sa ABC ang Bando Osmeña Pundok Kauswagan (BOPK) wala usay paglurang sa pagpalig-on sa ilang partido pinaagi sa pagpanghilabot sa mayor.
Gipasabot niini nga kun mopadayon siya sa pagpapili unya dili nila makuha ang 41 ka botos nga majority votes sa 80 ka mga barangay sama lang nga nibangga siya sa usa ka poste.
Hinungdan nga para kaniya dis-advantage na kaayo ngadto sa ilang grupo kini tungod kay ang maong election duwa sa numero ug hangtud karon ingon sa wala makairog ang ilang gipaabot nga panahon.
Nunot niini para kaniya tataw na kaayo nga ang election sa ABC nahuman na karong mga panahuna nga matawag nga exercise of futility ug ang ilang paningkamot useless na gumikan kay dakog factor ang endorsement ni Mayor Tomas Osmeña ngadto kang Talamban barangay kapitan Alvin Arcilla.
Nunot sa maong kalambuan si Arcilla ug mga kauban niining mga board of director tataw na nga magpapili nga walay moatbang sa ilang grupo sa BOPK.