Duna nay bag-ong SK Federation president ang dakbayan sa Sugbu human sa gipahigayong eleksyon kagahapong adlawa.
Sama sa gipaabot, makabungog nga kadaugan ang naangkon sa SK chairperson sa barangay Buhisan nga si Rengelle Pelayo.
Si Pelayo nakakuha og 57 botos gikan sa 65 ka mga SK chairperson nga misalmot ug mibotar sa gipahigayong eleksyon.
Lima lang ka botos ang nakuha sa nagsunod kang Pelayo nga si Matt Eric Medalle, ang SK chairman sa barangay Parian.
Wala na hinuoy nasurpresa sa kadaugan ni Pelayo tungod kay kini giingong maoy giendosar ni Mayor Tomas Osmeña sa nahisgutang posisyon.
Ang bag-ong napili nga SKF president mipasalig pagpadayon sa mga proyekto nga gipatuman sa iyang pulihan nga si Glena Bontuyan.
Partikular nga gitumbok ni Pelayo ang leadership training nga gipasiugdahan ni Bontuyan nga giingong dako og natabang kaniya.
Ang bag-ong napili nga SKF president sa siyudad mosugod na og lingkod sa City Council isip ex-officio member karong sunod semana.
Napili usab pagka-bise presidente sa SKF mao ang SK chairperson sa barangay Quiot nga si Princess Laluani.
Sila si Pelayo ug Laluani uban sa laing napili nga mga opisyal sa SKF sa lain-laing katungdanan giproklamar gilayon human modaug.
Ang SKF election maoy nagtapos sa tulo ka adlaw nga SK Organizational Leadership and Reorientation-Basic Orientation Seminar diha sa Cebu Business Hotel.