Duha ka sesyon sa sunod semana

Mopahigayon ug duha ka sesyon ang mga sakop sa konseho sa dakbayan sa Sugbu karong sunod semana.

Ang unang sesyon sa City Council gitakda karong umaabot nga adlaw’ng Lunes ug ang ikaduha unya na sa adlaw nga Biyernes.

Kini himuon sa mga sakop sa konseho tungod usab sa ilang kapakyas pagpahigayon sa ilang regular session sa miaging Miyerkules.

Matud ni Konsehal Bobby Cabarrubias nga ilang nasabutan nga tapakan ang napaltahan nilang sesyon agi’g pagtuman sa ilang gimbuhaton.

Wala makapahigayon og sesyon ang mga sakop sa City Council sa miaging Miyerkules tungod kay nanglarga ang mga konsehal ngadto sa kauluhan.

Ang kasagaran sa mga konsehal sa dakbayan mitambong sa national convention sa Philippine Councilors’ League (PCL).

Sa susamang kalambuan, si Konsehal Christopher Alix mao na karon ang regional president sa PCL human mapili sa katungdanan.

Kahinumduman nga si  Alix mao ang gipili nga presidente sa PCL Cebu City Chapter sa gipahigayong eleksyon pipila ka buwan na ang nakalabay.

Sa pikas bahin napili usab si Konsehal Augustus Pe Jr. isip usa sa mga board of directors sa PCL dinhi sa tunga-tungang Kabisay-an.

Samtang ang nasudnong piniliay sa PCL gikatahong unya pa sa sunod tuig himuon didto sa kauluhan.

Niining higayona, si Konsehal Hilario Davide III na maoy padaganon sa iyang mga kauban sa City Council alang sa nahisgutang eleksyon.

Ang tinubdan sa Banat News nagdumili hinuon pagbutyag kung unsa nga posisyon ang padaganan kang Davide sa PCL.