LTO-7 andam motubag sa inquiry vs smuggling

Giandam na sa  kadagkoan sa Land Transportation Office (LTO-7) ang mga dokumento sa registration sa mga sakyanan dinhi sa rehiyon alang   sa usa ka congressional  inquiry nga ipatawag labot sa pasangil nga naghitak ang car smuggling dinhi sa Sugbu.

Si Atty. Alex Leyson, regional director sa LTO-7 miingon nga sa pagkakaron nagpaabot na lang sila sa  notisya  gikan  sa Ubos Balay Balaoranan human gipahibalo ni  Kongresista Antonio Cuenco nga mahitabo kini sa dili pa ang Pasko.

Si Leyson  mikonpirmar nga base sa nahuptan nilang mga dokumento aduna gyoy sayop nga gipakita sa talaan sa Cebu Auto Dealers Association (CADA) sa pasangil nga miabot sa 21 mil kapin ang narehistro nga Sports Utility Vehicle gumikan kay gisagol kini sa taalan sa Utility Vehicle o sa ordinaryong sakyanan.

Nunot niini, angayan gyud kaayo lantawon gihapon ang maong pasangil sa car smuggling kini aron pagsuta gyud kun  nahitabo  ba kini dinhi sa Sugbu.

Giklaro niini nga sa iyang bahin andam na ang iyang mga papeles  sa pagtubag unya sa  kongresista uban sa ilang mga district heads.

Apan mintras tanto nga wala pa ang maong panahon paabuton lang una niya ang notisya una pa mohatag og igong detalye  base sa ilang nahuptan nga  dokumento.

Nasayran nga tulo ka komitiba ang mopahigayon sa congressional inquiry.