Konseho sa Sugbu  mipasalamat  sa mga sectoral representative

Gipasalamatan sa konseho sa dakbayan sa Sugbu ang duha ka sectoral representative sa City Council nga motapos na sa ilang termino.

Kini pinaagi usab sa usa ka privilege speech nga gipalanog ni Konsehal Edgardo Labella atol sa miaging sesyon sa konseho.

Ang duha ka sectoral representative sa City Council mao sila si ABC president  Eugenio “Jingjing” Faelnar ug SK Federation president Glena Bontuyan.

Gihulagway ni Labella nga mabungahon ang pagrepresentar nila ni Faelnar ug Bontuyan sa ilang tagsa-tagsa ka kapunongan diha sa konseho.

Alang sa konsehal ang dedikasyon ni Bontuyan kanunay’ng mahinumduman ug ang ligasiya niini gipaabot nga maghatag og dugang bunga sa mopuli kaniya.

Sa iyang habig, giangkon ni Bontuyan nga siya siguradong mingawon sa iyang mga kauban sa konseho sa iya nang pagbiya sa City Council.

Ang outgoing SKF president kahilakon dihang gibatbat niini ang iyang mga nahimo sulod sa iyang termino.

Sa pikas bahin, gidayeg usab ni Labella si Faelnar tungod sa nakab-ot nga mga kalamposan sa konseho nga nahimong tipik ang ABC president.

Nagpakahilom lang hinoon si Faelnar atol sa sesyon sa City Council ug dili sama kang Bontuyan nga tumang nakapadayag sa iyang gibati.