Gipaningkamutan sa Integrated Bar of the Philippines (IBP-Cebu Chapter) nga mahunong ang nagpadayong oil exploration sa Tañon Strait.
Kini human gipasabot ni Atty. Gloria Estenzo-Ramos ang Environmental Committee chairperson sa IBP-Cebu nga nakahatag og negatibong epekto sa mga molupyo nga nagsalig sa dagat ang maong oil exploration nga gipahigayon karon sa Department of Energy ug Japex.
Gibasehan niini ang pagtuon sa usa ka propesor sa UP nga si Lemuel Aragones nga naghulagway nga duna nay sobra sa 10 ka mga species sa kadagatan sa Tañon Strait ang na-apektuhan karon sa nagpadayong seismic survey.
Gipadayag ni Ramos nga walay pagtuon nga gihimo sa wala pa himoa ang maong oil exploration aron unta mahibaw-an ang negatibo ug dautang epekto sa maong proyekto.
Nunot niini gikwestiyon sa IBP ang maong oil exploration nga walay pagtugot ug partisipasyon sa mga molupyo sa nahisgutang lugar.
Ang oil exploration gisugdan niadtong Nobiyembre 14 ning bulana ug gitakdang matapos karon pang bulan sa Enero sunod tuig.