Hayag na ang kahigayonan nga ma-convert ang Automated Teller Machine kon ATM Card sa mga kawani sa Cebu City Hall ngadto na sa Electronics Card kun E-card.
Ang konseho sa dakbayan mihatag na og pagtugot kang Mayor Tomas Osmeña pagpirma sa Memorandum of Agreement kon MOA nga alang sa maong katuyuan.
Ang MOA gipaabot nga lagdaan tali ni Osmeña sa habig sa City Government ug sa kadagkuan sa Land Bank of the Philippines nga maoy provider sa ATM Card.
Matud ni City Administrator Francisco Fernandez nga dugay na nilang giplano nga i-convert ang ATM Card sa kapin sa 5 mil ka City Hall employees ngadto na sa E-Card.
Sumala pa ni Fernandez nga gawas nga maoy gamiton alang sa pagkubra sa ilang suweldo, ang E-Card magsilbi usab nga Identification Card kon ID sa mga empleyado.
Sa ingon niini nga paagi niingon si Fernandez nga dili na unya mahalin ang suweldo sa mga empleyado ngadto sa mga loan sharks sa City Hall.
“Dili na gyod na mabaligya ilang E-Card ngadto sa mga loan shark kay mao man sab na ang ilang gamiton pagpanso sa ilang DTR" sumala pa suma ni Fernandez.
Ang mga tigpatanto sa City Hall giingong maoy padayon nga naghupot sa mga ATM Card sa pipila ka mga kawani sa kagamhanan sa dakbayan nga nangutang niini.
Sa 5-6 kun 20 porsiento ang interes nga ipatong sa mga loan sharks sa gipahuwam niining kuwarta ngadto sa mga empleyado.
Giingong dili makabalibad niini ang mga kawani, ug labaw nang dili makapalta sa pagbayad sa ilang binuwan nga obligasyon.
Kini tungod kay ang mga loan sharks na maoy mokubra sa suweldo sa mga empleyado gamit ang ilang mga ATM Card.