Veco di makapasalig paigo pa ang kuryente sa Pasko

Dili makapaneguro ang Visayan Electric Company sa igong suplay sa kuryente sa Metro Cebu ilabi na karong Pasko hangtod dili maayo sa National Transmission Commission (Transco) ang naguba niining transmission line.

Gibutyag ni Ethel Natera, tigpamaba sa Veco nga nahinabi sa usa ka estasyonan sa radyo nga walay problema ang ilang system dihang nasinati ang black out sa Sugbu niadtong miaging hapon gumikan kay ang submarine cable sa Transco nakasugat og kakulian.

Hinuon, gipasalig ni Natera nga duna na silay mga contigency measures nga giandam ilabi na karong Pasko ug Bag-ong Tuig aron malikayan ang pagsinati og mga brown out niining mga higayona.

Matud ni Natera duna silay mga naka-estambay nang daan nga mga crew nga maoy motubag kun dunay masinati nga mga kakulian sama sa brownout nga motumaw matag karon ug unya.

Apan giklaro niya nga wala silay mahimo kun ang transmission line na ang makasugat og problema gumikan kay gipanag-iya man kini sa Transco ug bugtong nilang mahimo mao lang ang pag-apod-apod sa kuryente gikan sa ilang mga supplier  ngadto sa mga konsumedor.

Gitug-an ni Natera nga kagahapon sa buntag nakasinati usab og gamay’ng problema ang Naga Substation nga niresulta sa pag-brown out sa pipila ka mga lugar gikan sa Linao dakbayan sa Talisay ngadto na sa lungsod sa San Fernando.

Giklaro ni Natera nga wala kini magdugay og nabalik dayon ang siyento porsiyento nga suplay sa kuryente dinhi sa Metro Cebu.

Samtang gibutyag ni Ben Ipil, tigpamaba sa Transco sa dihang nahinabi sa  Banat News  nga padayon pa karon nilang gisusi kun unsa gyud ang hinungdan sa pagkaguba sa ilang transmission line nga maoy hinungdan sa nasinati nga blackout.

Pasiuna nilang pakisusi nagbutyag nga posible kining naigo sa liti hinungdan sa pagkapalong niini.