Kritikal ang kahimtang sa usa ka lalaki nga gidudahang akyat bahay gipusil alas 2 pasado ang takna kagahapon sa kaadlawon sa sitio Torel, barangay Canjulao, dakbayan sa Lapulapu.
Giila ni SP02 Nicanor Bacayo ang biktima mao si Rogelio Dungog, 46 anyos, minyo ug nagpuyo sa maong dapit.
Matud pa niya nga si Lorna Tagora maoy nakakaplag sa biktima nga diha sa gawas sa pultahan sa ilang panimalay nga naligo sa kaugalingong dugo.
Dugang pa ni SPO2 Bacayo ang biktima kinsa nakabaton og samad pinusilan sa buko-buko ug uban pang bahin sa iyang kalawasan dali nga gidala sa Opon District Hospital.
Human sa pasiunang pagtambal sa mga doktor sa maong tambalanan dali usab kining gibalhin sa Vicente Memorial Medical Center sa dakbayan sa Sugbo.
Matud pa ni SPO2 Bacayo nga nagtuo sila sa kapolisan nga nasaypan ang biktima nga kawatan nga maoy hinungdan nga napusilan kini.