Drugtest sa mga batang makasala suportado ni Jack

Gihangop ni  Konsehal Sylvan  Jakosalem ang kamanduan sa Korte Suprema nga ipaubos sa mandatory drug testing ang mga minor de edad nga makahimo og salaod.

Partikular nga ipa-drug test sugod karong adlawa, ang nag-edad ug 15 ngadto sa 18 anyos nga makahimo ug krimen nga dunay silot nga mukapin sa unom ka tuig nga pagkabilanggo.

Kun ang kamanduan mapatuman, posibleng mag-atubang na unya og labing minos duha ka kaso ang minor de edad nga mapamatud-ang tigamitan sa ginadiling drugas.

Matud ni konsehal Jakosalem gikinahanglan ang mandatory drug testing tungod kay giingong  misaka ang mga kaso sa kabatan-onan nga migamit og ginadiling drugas.

“Ni-increase man god ang gidaghanon sa mga minor de edad nga nag-drugs unya ang mga drug users are getting younger and younger.”nagkanayon ang konsehal.

Duna hinuoy mga pangutana kun kinsa ang mogasto sa mandatory drug test kung ipatuman ang kamanduan sa labaw'ng hukmanan.

Apan sumala  ni Jakosalem nga angayan lang nga ang nasudnong kagamhanan maoy moabaga unya sa galastuhan niini.

Ang konsehal nga sakop usab sa Committee on Public Order and Safety sa City Council niingon hinoon nga dunay matabang niini ang kagamhanan sa dakbayan.

Gani gipadayag ni Jakosalem nga siya mismo andam mopalabang ug resolusyon sa City Council nga maggahin og kantidad alang sa pagpalit  og mga drug testing kits.

Kini aron dunay magamit ang kapolisan sa ipahigayong mandatory drug test, kung dunay mga minor de edad niini nga madakpan.

“I think this is one way also sa pag-deter sa crime kay mahadlok na man sab unya ang mga batan-on nga masakpang nag-drugs sila” sumala pa ni Jakosalem.

Kung positibo ang resulta sa drug test, mahimo hinuon kining kwestiyonon sa   suspetsado o sa ginikanan, pinaagi sa pagpahigayon og confirmatory drug test.