Tulo ka residente sa duha ka barangay sa dakbayan sa Talisay ang naputlan sa kuryente atol sa adlaw sa kalag-kalag tungod kay gikawat sa wala mailhing mga kawatan ang mga kable sa ilang kuryente nga gikutay gikan sa poste paingon ngadto sa ilang mga balay.
Unang mitaho ngadto sa kapolisan sa siyudad si Norma Laspuña, 48 anyos, residente sa Ramona Village, Barangay San Isidro. Ang maong insidente gibanabanang nahitabo niadtong Biyernes sa kadlawon.
Nadala sa wala mailhing kawatan ang kable sa kuryente ni Laspuña nga dunay gitas-ong 15 metros.
Sunod nga mga biktima mao sila si Clemento Briones ug Ofelia Villaver mga hingkod ang panuigon ug parehong residente sa Sitio Calachuchi, barangay Lawaan II.
Ang maong insidente nahitabo usab niadtong Biyernes sa kadlawon kinsa ang duha ka biktima parehong nakawatan og tag-napulo ka metrong gitas-on sa kable sa kuryente.
Base sa taho nga ang tulo nagtuo nga nag-brown out tungod kay nawagtangan sila og kuryente apan nasuta na lang sa maong mga biktima nga nangaputol na diay ang ilang mga linya diha sa poste sa kuryente ug wala na ang ilang mga kable.