VM Loot wa ‘tandog sa lima ka opposition brgy. kap

Wala mabalaka ang kampo ni Bise-Mayor Maria Luisa Loot sa lungsod sa Daanbantayan nga lima sa 20 ka barangay kapitan sa habig sa iyang kaatbang ang nidaug sa niaging eleksiyon.

Ang lima giingong gipaluyohan ni Augusto “Itok” Corro, naparot nga kandidato sa pagka-mayor sa eleksiyon niadtong Mayo.

Matud pa ni Loot nga ang kapitan ra ang iya ni Corro apan ang kinabag-an sa katawhan ang anaa gihapon sa iya nagpaluyo.

Gani wala pa’y seguro kun pipila sa lima ka barangay kapitan ang motapon sa iyang kampo hangtud sa sunod piniliay sa tuig 2010.

Ang lima ka mga barangay kapitan mao sila si Agapito Tancawan sa Bagay, Bernardito Luche Jr. sa Bakhawan, Arsenio Luciano sa Bateria, Jose Moreno sa isla sa Carnaza ug Romulo de Leon sa Poblacion.

Si Loot nihagit na kang Corro sa paghunong na sa paglingla ngadto sa katawhan nga molingkod na siya isip mayor karong buwana sangit may desisyon na ang korte sa iyang kaso.

Matud pa ni Loot nga ang maayong buhaton ni Corro mao nga magpaabot nalang sa 2010 sanglit sila na ang mag-atbang sa pagka-mayor.