Honorarium malangay

Gipaabot nga malangay pa ang pag-release sa mga honorarium sa mga magtutudlo nga niserbisyo sa bag-o lang natapos nga barangay ug SK election niadtong Lunes.

Hinuon gibutyag ni Comelec Provincial Supervisor Atty. Lionel Marco Castiliano dihang nahinabi sa Banat News nga anaa na sa ilang buhatan ang tseke alang sa honorarium sa mga magtutudlo nga nakaserbisyo sa nilabay’ng piniliay.

Apan matud niya medyo malangay pa ang pag-apod apod niini gumikan kay pagkakarun dili pa nila kini maasikaso gumikan sa mga tiwasonon nilang gimbuhaton sa bag-o lang natapos nga piniliay sama sa pag-atiman sa daghang mga reklamo may labot sa mga kalapasan  sa gipahigayung piniliay.

Gitumbok ni Castiliano ang mga election offenses nga nakalapas sa Omnibus Election Code sama sa vote buying, illegal campaigning ug uban pa.

Gawas niini gipasabot ni Castiliano nga duna pay proseso nga angay sundon una pa ma-release ang maong honorarium kini sama sa  mga municipal  ug city treasurers office maoy mo-follow up pagkuha ning maong honorarium sa ilang buhatan.

Kadtong mga magtutudlo nga niserbisyo sa nilabay’ng piniliay makadawat og tag P1,000.00 nga honorarium.